Autori: Arlind Beqiraj
Autobusët e trafikut urban çdo ditë e përshkojnë rrugën e njëjtë.
Por që nga e mërkura të njëjtë nuk do ta kenë edhe çmimin e biletave.
Kjo pasi çmimi i biletës njëdrejtimëshe nga 0.50 centë u rrit në 0.80 centë.
Ndërsa ajo ditore, do të kushtojë plot 0.40 centë më shumë.
E gjitha kjo pas një vendimi të Komunës së Prishtinës dhe Trafikut Urban.
Këtë ngritje të çmimit, nuk po e mirëpresin qytetarët.
E dikujt tjetër, ngritja e çmimit të biletave po i duket e arsyeshme.
“Me siguri rritja duhet me qenë e arsyeshme për shkak se janë ngritur çmimet e derivateve….”, u shpreh një qytetar.
E Komuna e Prishtinës, këtë ngritje të çmimeve, po e arsyeton me procesin e digjitalizimit.
“Shtrenjtimin, nëse e shohim si koncept, nëse i referohemi arsyeshmërisë së kryeqytetit në fazën e digjitalizimit dhe në fazën ku është duke ndryshuar komplet qasja e trafikut urban ndaj qytetit, atëherë edhe kjo biletë, themi, prej 10 cent ka ndryshuar në kuletën digjitale”, ka thënë Bajqinovci.
Sipas tij, ky vendim është marrë në koordinim me ekspertët.
“Rritja e çmimit ka ardhur pasi që kemi ekipet punuese të ekspertëve, edhe vendorë edhe ndërkombëtarë. Sipas asaj që kemi, rishikimit të buxhetit, pastaj duke e parë edhe databazën që e kemi, edhe financiare edhe operative, kemi ardhur deri te ky përfundim. Kini të sigurt se përditësimi i shtrenjtimit të biletave është bërë pas një kohe të gjatë që çmimet kanë qenë të njëjta”, ka thënë tutje Bajqinovci.
Ndryshe, ndryshim të çmimeve kishte edhe në llojet e tjera të biletave.
Kësisoj, ajo javore nga 1 korriku do të kushtojë 6 euro nga 4 sa ishte më parë.
Ndërsa për blerjen e biletës mujore, qytetarit tani do t’i duhen 18 euro.
