Policia e Kosovës ka njoftuar se hetimet kanë zbuluar se dy kërcënimet e rreme për bombë në Stacionin e Autobusëve në Prishtinë janë bërë nga i njëjti numër telefonik në Serbi.
Sipas Policisë, rasti i fundit është raportuar më 30 qershor 2026, rreth orës 07:48, kur Qendra Operative e Drejtorisë së Përgjithshme të Policisë ka pranuar një telefonatë në gjuhën serbe, në të cilën pretendohej në mënyrë të rreme se në Stacionin e Autobusëve ishte vendosur një mjet shpërthyes.
Menjëherë pas marrjes së informatës, Policia ka reaguar sipas procedurave operative, duke evakuuar qytetarët, siguruar perimetrin dhe angazhuar njësitë e specializuara, përfshirë Njësinë për Trajtimin e Mjeteve Shpërthyese, Njësinë K9, hetuesit policorë, si dhe ekipet e zjarrfikësve, autoambulancës dhe Drejtorisë së Emergjencave të Komunës së Prishtinës.
Pas kontrollit të detajuar të objektit dhe zonës përreth, nuk është gjetur asnjë mjet i dyshuar shpërthyes dhe Stacioni i Autobusëve ka rifilluar punën normalisht.
Policia bëri të ditur se lidhur me rastin është njoftuar prokurori kompetent, i cili ka autorizuar inicimin e rastit për veprën penale “Lajmërimi apo kallëzimi i rremë”.
Sipas njoftimit, ky rast është ndërlidhur me kërcënimin e rremë të 22 qershorit 2026, i cili kishte në shënjestër po të njëjtin objekt.
“Hetimet intensive të zhvilluara nga Policia e Kosovës, përkatësisht nga Drejtoria e Hetimit të Krimeve Kibernetike, kanë rezultuar se të dy telefonatat janë realizuar nga i njëjti numër telefonik në Serbi. Gjithashtu, gjatë analizave teknike dhe hetimore janë siguruar prova dhe të dhëna të tjera elektronike që ndërlidhin këto raste me njëri-tjetrin dhe që tashmë janë pjesë e procedurës hetimore”, thuhet në njoftimin e Policisë.
Policia theksoi se ka ngritur kapacitete të avancuara profesionale dhe teknike në fushën e hetimeve kibernetike dhe gjurmimit të komunikimeve kriminale, duke përfshirë edhe aktivitetin në rrjetet sociale.
“Përvoja ka dëshmuar se autorët që tentojnë të fshihen pas telefonatave anonime, aplikacioneve elektronike, profileve të rreme apo veprimit nga shtete të tjera identifikohen dhe asnjë autor nuk mbetet anonim”, thuhet më tej në komunikatë.
Në fund, Policia e Kosovës ka bërë të ditur se do të përdorë të gjitha mjetet ligjore, profesionale dhe mekanizmat e bashkëpunimit ndërkombëtar për të identifikuar dhe sjellë para drejtësisë çdo person që tenton të cenojë sigurinë publike dhe të krijojë panik te qytetarët.
Gjithashtu, Policia u ka bërë thirrje qytetarëve që të mos bien pre e dezinformatave dhe ka theksuar se çdo informacion që lidhet me sigurinë trajtohet me seriozitet maksimal, me qëllim mbrojtjen e jetës dhe sigurisë së qytetarëve.
