Projektligji që nxiti protesta nga kategoritë e dala nga lufta, ai për pagën minimale, ende nuk dihet kur do të shkojë në lexim të dytë në Kuvend.
Deputeti i Lëvizjes Vetëvendosje njëherësh anëtarë i Komisonit për Buxhet, Visar Korenica thotë se po presin formimin e grupit punues që do t’i trajtojë amendamentet potenciale.
“Ligji është në procedurë. Ka kalu në lexim të parë. Presim që të formohet edhe grupi punues. Në ndërkohë nuk kemi pranu ndonjë amendament nga ana e Qeverisë. Do të varet edhe prej vullnetit të tyre për me vazhdu tutje në leximin e dytë”, thotë Korenica.
Ai shton se pavarësisht se pensionet e veteranëve nuk përfshihen në ligj, qeveria ka për synim që atyre t’u garantohet një jetë e dinjitetshme.
“Votat i ka qeveria ashtu siç i ka pasë në lexim të parë po ashtu edhe në lexim të dytë. Është e rëndësishme që me u rrit standardet dhe mirëqenia e përgjithshme e qytetarëve njëkohësisht duke punuar edhe në çështjen që është ngrit shqetësimi i veteranët që atyre t’u garantohet një pagë e dinjitetshme, një kompensim i dinjitetshëm”, shtoi ai.
Nga Partia Demokratike e Kosovës thonë që në përcaktimin e pagës minimale ka munguar dialogu social i Qeverisë me kategoritë e prekura, teksa kërkojnë që veteranët të përfshihen në ligjin për pensione.
“Ato që i kemi ngritur edhe në Parlamentin e Kosovës qysh është për çështjen e përfshirjes së veteranëve të luftës së Kosovës, qysh është çështja e të verbërve: tetraplegjikëve dhe paraplegjikëve që të përfshihen në ligj. Nëse jo, ne në amendamentet tona konkrete kemi propozu që ato të heken fare me këtë projektligj, të mos trajtohen fare dhe të bazohen me ligjin funksional që është Ligji i Pensioneve të Kosovës”, thotë deputeti i PDK-së, Mërgim Lushtaku.
Për t’i dëgjuar kërkesat e veteranëve, në takim me ta ishte edhe kryeministri Kurti, i cili deklaroi se do të bëjë një ofertë për ta. Për këtë televizioni ka pyetur edhe Zyrën e Kryeministrit por nuk mori ndonjë përgjigje gjatë së enjtes.
Kronika e realizuar nga gazetari Gojart Jashari.
