Forca e Sigurisë së Kosovës (FSK) ka njoftuar se vazhdon të gëzojë besimin më të lartë të qytetarëve si institucioni më i besueshëm i sigurisë në vend, bazuar në rezultatet e Anketës Rajonale WeBalkans 2026.
Sipas të dhënave të publikuara nga FSK, 87.4 për qind e qytetarëve të anketuar kanë shprehur besim ndaj këtij institucioni, duke e renditur atë në krye të institucioneve të sigurisë në Republikën e Kosovës.
Me këtë rast, komandanti i FSK-së, gjenerallejtënant Bashkim Jashari, falënderoi qytetarët për besimin e vazhdueshëm ndaj Forcës së Sigurisë së Kosovës.
Ai shprehu mirënjohje edhe për personelin e FSK-së për profesionalizmin, përkushtimin dhe angazhimin në përmbushjen e misionit, si dhe falënderoi partnerët dhe aleatët ndërkombëtarë, në veçanti Shtetet e Bashkuara të Amerikës, për mbështetjen e vazhdueshme në zhvillimin profesional të forcës.
Në njoftimin e saj, FSK vlerësoi se ky rezultat pasqyron punën dhe përkushtimin institucional të pjesëtarëve të saj në përmbushjen e detyrave kushtetuese dhe ligjore.
“Ky vlerësim i lartë paraqet dëshmi të përkushtimit, profesionalizmit dhe integritetit institucional të pjesëtarëve të Forcës së Sigurisë së Kosovës në përmbushjen e detyrave dhe përgjegjësive të tyre kushtetuese dhe ligjore. Kjo arritur është falë angazhimit dhe shërbimit vetëmohues të personelit të FSK-së. Forca e Sigurisë së Kosovës mbetet e përkushtuar që misionin dhe detyrat e saj t’i realizojë me profesionalizëm, disiplinë dhe përgjegjësi të lartë, duke qenë gjithmonë e gatshme për t’u dalë në ndihmë qytetarëve dhe për të kontribuar në sigurinë dhe stabilitetin e vendit. Besimi i qytetarëve përbën nder, përgjegjësi dhe motiv shtesë për FSK-në që të vazhdojë zhvillimin e kapaciteteve profesionale dhe operacionale, në funksion të përmbushjes së misionit të saj dhe të kontributit për paqen, sigurinë dhe stabilitetin në vend dhe më gjerë”, thuhej në njoftim.
