Dhjetëra mijëra shtëpi në Francën perëndimore kanë mbetur pa energji elektrike ndërsa vendi po përballet me një valë të nxehti rekord.
Rreth 68,000 shtëpi në Brittany janë prekur dhe energjia pritet të rikthehet plotësisht jo më herët se mbrëmjen e së mërkurës.
Franca regjistroi ditën dhe natën më të nxehtë që nga fillimi i matjeve, me temperatura që arritën deri në 44.3°C në rajonin Landes, raporton BBC.
Mbi gjysma e vendit mbetet nën alarm të kuq për vapë, me temperatura që mund të arrijnë deri në 43°C në jugperëndim.
Për shkak të temperaturave ekstreme, Muzeu i Luvrit dhe Kulla Eiffel kanë shkurtuar oraret e vizitave.
Duke folur për radion franceze, ministri i punës Jean-Pierre Farandou tha se “jemi në proces të të kuptuarit se jemi bërë një vend i nxehtë” dhe paralajmëroi se shoqëria mund të ketë nevojë të përshtatet.
Vala e të nxehtit po përhapet në pjesë të tjera të Evropës, ndërsa paralajmërime për temperatura ekstreme janë lëshuar në Mbretërinë e Bashkuar, Gjermani, Holandë, Belgjikë, Poloni, Kroaci dhe Hungari.
Franca, Spanja dhe Italia janë vendet më të prekura. Sipas kryeministrit francez, të paktën 40 persona janë mbytur në incidente të lidhura me valën e të nxehtit që nga e enjtja e kaluar.
Temperaturat pritet të arrijnë 37 gradë Celsius të mërkurën në Gjermani dhe njerëzit po paralajmërohen të mos nënvlerësojnë rreziqet e notit.
Gjithashtu, ekziston frika e thatësirës në disa rajone. Në Brandenburg, Hesse dhe North Rhine-Ëestfalen, autoritetet po u bëjnë thirrje njerëzve që ta përdorin ujin me kursim, raporton gazeta gjermane Die Ëelt.
Autoritetet po paralajmërojnë gjithashtu për rrezik të shtuar nga zjarret pyjore.
Lehtësim i pjesshëm pritet nga e premtja, kur temperaturat do të fillojnë të bien gradualisht, megjithëse stuhitë mund të sjellin përmbytje të shpejta dhe breshër të madh.
