Ukraina tha se lejimi i anijes që të largohet nga porti i Turqisë ishte një veprim “i papranueshëm” dhe për këtë temë do të thërrasë në bisedë ambasadorin e Turqisë.
“Na vjen keq që anija ruse, Zhibek Zholy, e cila ishte e mbushur plotësisht me drithin e vjedhur ukrainas, është lejuar që të largohet nga porti Karasu, pavarësisht të dhënave që u janë prezantuar autoriteteve turke”, tha zëdhënësi i Ministrisë së Jashtme ukrainase, Oleg Nikolenko përmes një postimi në Tëitter.
“Ambasadori turk në Kiev do të ftohet nga Ministria e Jashtme e Ukrainës për të sqaruar këtë situatë të papranueshme”, shtoi ai.
Ukraina është një prej prodhuesve dhe eksportuesve më të mëdha në botë të drithërave. Por, Rusia – që ka nisur pushtimin e Ukrainës më 24 shkurt – ka bllokuar portet ukrainase, duke ndikuar në rënien e furnizimeve botërore të ushqimit dhe rritjen e çmimeve.
