Forcat e sigurisë në kryeqytetin turk kryen bastisje gjithëpërfshirëse të martën përpara samitit të NATO-s, që do mbahet muajin e ardhshëm, dhe arrestuan më shumë se 200 persona të dyshuar për lidhje me grupe ekstremiste.
Presidenti i SHBA-së, Donald Trump, pritet t’u bashkohet udhëheqësve të tjerë të aleancës prej 32 anëtarësh në Ankara për samitin e 7-8 korrikut.
Turqia po planifikon masa të rrepta sigurie për samitin, duke përfshirë ndalimin e demonstratave dhe kufizimin e aksesit në rrugët që të çojnë në aeroporte, si dhe izolimin e zonave përreth vendit të samitit dhe hoteleve që presin delegacionet.
Qeveria e presidentit turk, Recep Tayyip Erdogan, i ka dhënë përparësi sigurisë dhe autoritetet kryejnë rregullisht bastisje sigurie.
Muajin e kaluar, forcat e sigurisë arrestuan 324 persona të dyshuar për lidhje me grupin ashtuquajtur Shteti Islamik në një operacion në të gjithë vendin .
Herët të martën, prokurorët turq lëshuan urdhra ndalimi për 241 të dyshuar dhe 209 prej tyre u morën më pas në paraburgim në bastisjet e policisë dhe xhandarmërisë rreth Ankarasë, sipas një deklarate nga zyra e kryeprokurorit, transmeton AP.
Bastisjet ishin ende në vazhdim të martën më vonë për të arrestuar pjesën tjetër të të dyshuarve.
