Një person ka mbetur i lënduar pas një sulmi me thikë që ka ndodhur mbrëmjen e së premtes në sheshin “Nëna Terezë” në Prishtinë.
Sipas raportit të Policisë së Kosovës, ngjarja ka ndodhur rreth orës 22:30, ku një mashkull kosovar është sulmuar me thikë nga disa persona.
Bazuar në deklaratat e dëshmitarëve, viktima dyshohet se është therur nga një i dyshuar mashkull kosovar, i njohur për policinë, në bashkëpunim me disa persona të tjerë, të cilët aktualisht ndodhen në kërkim.
I lënduari është dërguar për trajtim mjekësor në (QKUK, ndërsa sipas mjekëve gjendja e tij është stabile dhe ai ndodhet jashtë rrezikut për jetë.
Policia ka bërë të ditur se njësi të saj janë angazhuar në sigurimin e viktimës, ndërsa hetimet për zbardhjen e plotë të rastit dhe arrestimin e të dyshuarve janë duke vazhduar.
“Sheshi Nëna Terezë, Prishtinë 19.06.2026 – 22:30. Një mashkull kosovar është dërguar për trajtim mjekësor në QKUK për shkak se ishte sulmuar me thikë nga disa persona. Sipas dëshmitarëve viktima është therur me thikë nga i dyshuari mashkull kosovar (i njohur për policinë), së bashku me disa persona tjerë të dyshuar të cilët janë në kërkim të policisë. Viktima është duke u trajtuar në QKUK dhe sipas mjekëve është jashtë rrezikut për jetë. Njësia policore është në sigurim të viktimës. Rasti në hetime”, thuhet në raport./teve1.info/
