Kandidati për deputet nga Lidhja Demokratike e Kosovës, Burim Meta, ka komentuar rezultatet e zgjedhjeve të 7 qershorit, duke thënë se pritjet brenda partisë kanë qenë më të mëdha sesa rezultati i arritur.
Në emisionin “Këndi i Debatit” në Tëvë1, Meta tha se gjatë fushatës zgjedhore kishte bindjen se LDK-ja do të renditej së paku si partia e dytë në nivel vendi dhe se Lëvizja Vetëvendosje do të pësonte rënie më të theksuar.
“Nga takimet që kemi pasur me qytetarët, perceptimi ynë ka qenë se së paku do të ishim partia e dytë në nivel nacional. Gjithashtu kemi pritur një rënie më të madhe të LVV-së, si rezultat i bashkimit dhe organizimit brenda LDK-së”, tha Meta.
Ai vlerësoi se LDK-ja kishte krijuar një frymë të re politike dhe një perceptim ndryshe te qytetarët, duke veçuar edhe figurat e Vjosa Osmanit dhe Lumir Abdixhikut.
“U krijua një perceptim i ri i së djathtës, për të cilin skena politike në Kosovë kishte nevojë. Gjithashtu ka ekzistuar një sentiment qytetar për Vjosa Osmanin dhe më pas për binomin që u krijua mes saj dhe Lumir Abdixhikut. Megjithatë, rezultatet treguan ndryshe dhe natyrisht ne e pranojmë këtë rezultat pa e kontestuar”, u shpreh ai.
Meta tha se gjatë vizitave në degët e LDK-së kishte vërejtur probleme të brendshme në parti, duke shtuar se gjendja nuk ishte ajo që do të dëshironte ta shihte.
“Nga takimet që kam pasur në degën e LDK-së në Ferizaj dhe në degë të tjera, kam parë se partia ka qenë në një pozicion jo të dëshirueshëm. Ka pasur rënie dhe probleme të brendshme, por pavarësisht kësaj kemi arritur një rritje të konsiderueshme krahasuar me parashikimet që ishin bërë më herët”, deklaroi Meta.
