Ish-ministri i Tregtisë, Ismet Mulaj, ka komentuar paralajmërimet se Kosova rrezikon të humbasë rreth 60 milionë euro nga “Plani i Rritjes” i Bashkimit Evropian, si pasojë e krizës politike në vend.
Në emisionin “Ditari” në Tëvë1, Mulaj ka theksuar se paqëndrueshmëria politike ndikon drejtpërdrejt në prishjen e imazhit të Kosovës tek partnerët ndërkombëtarë dhe investitorët potencialë, duke dekurajuar investimet dhe duke ngadalësuar zhvillimin ekonomik.
Sipas tij, mungesa e institucioneve funksionale, si Kuvendi dhe Qeveria, e vështirëson bashkëpunimin me Bashkimin Evropian dhe organizata të tjera ndërkombëtare, çka mund të çojë në mosrealizimin e fondeve të planifikuara.
“E para është prishja e imazhit të Kosovës tek partnerët ndërkombëtarë dhe investitorët potencialë. Krizat politike sjellin dekurajim të investimeve dhe rënie ekonomike, me më pak investime. Natyrisht, fondet e Bashkimit Evropian apo të organizatave tjera ndërkombëtare nuk do të vijnë në Kosovë nëse nuk ka institucione funksionale, si Kuvendi dhe Qeveria, dhe partnerë me të cilët mund të negociohet. Prandaj, klasa politike duhet të angazhohet që Kosova të mos hyjë nga një krizë në tjetrën, sepse dëmet janë të mëdha dhe pasojat i vuajnë qytetarët,” ka deklaruar Mulaj.
Ai ka shtuar se tejkalimi i krizës politike do t’i mundësonte Kosovës jo vetëm përfitimin e 60 milionë eurove, por edhe qindra miliona euro të tjera nga programet e BE-së.
“Tejkalimi i krizës politike sa më shpejt i sjell Kosovës jo vetëm këto 60 milionë euro, por edhe shumë fonde të tjera që janë me interes për vendin,” ka thënë ai.
Mulaj ka apeluar për zgjidhje të shpejtë të krizave politike dhe ndërtim të institucioneve funksionale që mund të negociojnë me partnerët ndërkombëtarë.
Ndryshe, në takimin e Komitetit Monitorues BE–Kosovë për Instrumentin për Reforma dhe Rritje, është paralajmëruar se Kosova rrezikon të humbasë rreth 60 milionë euro në qershor, dhe deri në 250 milionë euro deri në fund të vitit, nga Plani i Rritjes i Bashkimit Evropian.
Sipas diskutimeve në takim, këto rreziqe lidhen me vonesat në zbatimin e reformave dhe mosfunksionalizimin e institucioneve.
Po ashtu, janë përmendur afatet e 30 qershorit, 15 korrikut dhe fundi i vitit si data kyçe për përmbushjen e obligimeve, nga të cilat varen qindra miliona euro për Kosovën./teve1.info/
