Ka përfunduar edicioni i 8-të i festivalit “Mitrovica Guitar Days”.
Në natën përmbyllëse të tij mori pjesë edhe kryeministri në detyrë, Albin Kurti.
Në fjalën e tij para të pranishmëve,Kurti tha se festivali Mitrovica Guitar Days, tashmë është shndërruar në një pikë të rëndësishme takimi për artistë, studentë dhe adhurues të muzikës nga Kosova, rajoni dhe më gjerë.
“Festivali nuk ishte vetëm një seri koncertesh. Ai është një investim në edukimin estetik, në zhvillimin e të rinjve dhe në promovimin e Kosovës si një vend i cili e vlerëson kulturën, talentin dhe bashkëpunimin ndërkombëtar. Çdo student i cili mori pjesë në masterklasa, çdo garues që u ngjit në skenë dhe çdo i ri i cili u frymëzua nga këto ditë muzike, është pjesë e suksesit të këtij festival”, u shpreh kryeministri në detyrë Kurti.
Kryeministri vlerësoi se Kosova ka nevojë për më shumë ngjarje të këtilla, sepse kultura dhe arti siç tha si janë ndër ambasadorët tanë më të mirë.
