Njohësi i çështjeve politike, Shkëlqim Jakupi, vlerëson se kryeministri në detyrë, Albin Kurti, ka ndryshuar qasjen e tij politike pas zgjedhjeve, duke shprehur nevojën për bashkëpunim me partitë opozitare në funksion të formimit të institucioneve të reja.
Sipas Jakupit, Kurti e kuptoi që në ditën e zgjedhjeve se situata politike dhe organizative në vend nuk lejon mbajtjen e zgjedhjeve të njëpasnjëshme, duke pasur parasysh edhe numrin e madh të qytetarëve nga diaspora që qëndrojnë në Kosovë gjatë proceseve zgjedhore.
“Kurti në ditën e zgjedhjeve e kuptoi se në Kosovë nuk munden me u organizua zgjedhjet të një pas njëshme me 28 dhjetor, e ka të pamundur me organizua zgjedhje kur ka mbi 200 mijë qytetarë të diasporës prezent fizik në Kosovë dhe nga ajo ditë deri sot, ai e ka shpreh vazhdimisht nevojën për bashkëpunim me opozitën për formimin e institucioneve, ai sot po kërkon një opozitë konstruktive deri sa dje kërkonte lider apartiak, apolitik për formimin e institucioneve, kjo tregon që janë zbutur deklaratat dhe qëndrimet e tyre”, ka deklaruar ai.
Ai nuk përjashton mundësinë e bashkëpunimit të Lëvizjes Vetëvendosje me partitë opozitare, përfshirë edhe Aleanca.
“Kurti shikon një mundësi bashkëpunimi edhe me Aleancën, posaçërisht këtë rast ku Haradinaj aktualisht nuk ka ndonjë pozitë udhëheqëse partiake, mirëpo kjo do ta determinon bashkëpunimin e VV-së me partitë tjera e determinon posaçërisht numri i ulsve që fitojnë partitë në Kuvendin e Kosovës. Partitë politike në Kosovë vetëm i kanë filluar negociatat për formimin e institucioneve, do të kemi institucione të formuara mes partisë së parë dhe partive opozitare, një stabilitet afatgjatë shpresojmë”, tha Jakupi.
Jakupi shtoi se negociatat për formimin e institucioneve sapo kanë nisur dhe se në fund pritet të arrihet një marrëveshje mes partisë fituese dhe partive opozitare./teve1.info/
