Kryetari i Prishtinës, Përparim Rama, ka uruar qytetarët me rastin e Ditës së Çlirimit të Kosovës, duke theksuar rëndësinë e sakrificës së atyre që luftuan për lirinë e vendit.
Në një postim në Facebook, Rama ka shkruar se kjo sakrificë e obligon shoqërinë kosovare të ndërtojë një shtet ku liria nuk mbetet vetëm e drejtë kushtetuese, por bëhet realitet i përditshëm, ndërsa demokracia të shndërrohet në kulturë të jetës politike dhe qytetare.
Ai ka theksuar se demokracia matet me institucione të forta, drejtësi të barabartë, liri të shprehjes, respekt për mendimin ndryshe dhe mundësi të barabarta për të gjithë qytetarët.
“Në këtë Ditë të Çlirimit të Kosovës, kujtojmë se sakrifica e atyre që luftuan për Kosovën na obligon të ndërtojmë një shoqëri ku liria nuk është vetëm e drejtë kushtetuese, por realitet i përditshëm, dhe ku demokracia nuk mbetet ideal, por bëhet kulturë e jetës sonë politike dhe qytetare. Demokracia matet me institucione të forta, me drejtësi të barabartë, me liri të shprehjes, me respekt për mendimin ndryshe dhe me mundësi të barabarta për secilin qytetar”, ka shkruar Rama.
Sipas tij, nderimi më i madh për të rënët për Kosovën nuk është vetëm përmes fjalëve dhe kujtimeve, por përmes ndërtimit të një shteti ku sundon ligji, mbrohet dinjiteti i qytetarëve dhe përgjegjësia publike është vlerë e përditshme.
“Nderimi më i madh për ata që ranë për Kosovën nuk janë vetëm fjalët dhe kujtimet, por ndërtimi i një shteti ku sundon ligji, ku mbrohet dinjiteti i secilit dhe ku përgjegjësia publike është vlerë, jo përjashtim. Urime 12 Qershori, Dita e Çlirimit të Kosovës”, ka përfunduar ai./teve1.info/
