Ish-presidentja e Kosovës, Vjosa Osmani, ka uruar 12 Qershorin – Ditën e Çlirimit të Kosovës, duke e cilësuar si një nga datat më të rëndësishme në historinë e vendit.
Në një postim në Facebook, Osmani ka thënë se kjo datë shënon momentin kur dhimbja e luftës i la vend shpresës dhe lirisë, pas hyrjes së forcave të NATO-s në Kosovë.
“Qofsh përjetë e bekuar, Kosova jonë e dashur! 12 Qershori është dita kur lotët e dhimbjes nisën t’i lëshojnë vend shpresës. Dita kur Kosova filloi të marrë frymë e lirë. Dita kur ëndrra e shumë brezave për liri u bë realitet. Kjo është dita kur mbi tokën e djegur e të stërvuajtur të Kosovës zbarkoi shpresa”, ka shkruar Osmani.
Ajo ka përkujtuar edhe dëshmorët e Ushtrisë Çlirimtare të Kosovës, martirët e lirisë, si dhe familjet që sakrifikuan gjatë luftës.
“Sot, me dhimbje e krenari, kujtojmë bijat dhe bijtë më të mirë të këtij vendi, dëshmorët e UÇK-së të prirë nga Kryekomandanti Adem Jashari, si dhe martirët e lirisë që dhanë jetën që ne të jetojmë të lirë”, ka shtuar ajo.
Osmani ka përmendur edhe ish-presidentin Ibrahim Rugova, duke vlerësuar rolin e tij në ndërtimin e aleancave ndërkombëtare në periudhat më të vështira të Kosovës.
“Në këtë ditë të shenjtë shprehim mirënjohjen e pafund për vizionin e Atit Themeltar të Republikës sonë, Presidentit Rugova, i cili në kohët më të rënda të historisë sonë diti të ndërtojë aleanca që na u gjendën pranë në ditët më të vështira”, ka shkruar Osmani.
Ajo theksoi se Kosova do të vazhdojë të ecë përpara si shtet i lirë, i pavarur dhe sovran, duke nderuar sakrificën e të rënëve dhe mbështetjen e aleatëve ndërkombëtarë.
