Kandidati për deputet nga Lidhja Demokratike e Kosovës, Driton Selmanaj ka deklaruar se Kosova ndodhet përballë një momenti të rëndësishëm gjeopolitik, duke theksuar se vendi duhet të përcaktojë qartë orientimin e tij strategjik në krah të Shteteve të Bashkuara të Amerikës dhe aleatëve perëndimorë.
Përmes një reagimi publik, Selmanaj tha se Kosova nuk ka luksin të mbajë një qëndrim të paqartë në një kohë kur, sipas tij, përplasjet gjeopolitike mes Perëndimit dhe bllokut të udhëhequr nga Rusia dhe Kina po bëhen gjithnjë e më të dukshme.
Ai vlerësoi se marrëdhënia me SHBA-në përbën themelin mbi të cilin janë ndërtuar liria, pavarësia dhe siguria e Kosovës, duke kërkuar që kjo aleancë të forcohet edhe më tej përmes projekteve strategjike.
Selmanaj përmendi gazifikimin e Ballkanit dhe ndërtimin e rrjeteve të sigurta 5G, të përfshira në Marrëveshjen e Uashingtonit të nënshkruar më 4 shtator 2020, si iniciativa që, sipas tij, e lidhin Kosovën më ngushtë me SHBA-në dhe botën perëndimore, ndërsa kufizojnë ndikimin rus dhe kinez në rajon.
Sipas tij, në kohën kur shtetet evropiane po punojnë për të reduktuar varësinë energjetike nga Rusia dhe për të forcuar sigurinë strategjike, Kosova nuk duhet të mbetet anash këtyre proceseve.
Ai theksoi se orientimi euroatlantik i Kosovës duhet të jetë një çështje konsensusi kombëtar dhe jo objekt përplasjesh politike apo partiake.
“Nje Kosovë e lidhur ngushtë me SHBA-të dhe aleatët perëndimorë është më e fortë, më e sigurt dhe më e përgatitur për sfidat e së ardhmes”, ka deklaruar Selmanaj, duke bërë thirrje për vendime strategjike dhe unitet politik rreth këtij orientimi./teve1.info/
