Eksperti i çështjeve politike, Ilir Kulla, ka komentuar protestat që po mbahen prej ditësh për Zvërnecin, duke vlerësuar se ato kanë ndikuar në skenën politike shqiptare dhe kanë nxjerrë në pah kërkesën për ndryshim të sistemit politik.
Në emisionin “Matrix” në Tëvë1, të moderuar nga Mehmet Kalisi, Kulla tha se protestat i kanë shkaktuar dëm politik kryeministrit Edi Rama, por sipas tij, goditjen më të madhe e ka marrë opozita.
“Kjo protestë e ka dëmtuar shumë Edi Ramën dhe kredibilitetin e tij, por nuk e ka shkatërruar. Kjo protestë ka dëmtuar më shumë partinë e Berishës. Në kushte të tjera, këta protestues do të ishin elektorati i Partisë Demokratike”, ka thënë Kulla.
Sipas tij, fakti që protestuesit po shprehin pakënaqësi si ndaj Ramës ashtu edhe ndaj Berishës, tregon se kërkojnë një ndryshim më të thellë politik.
“Fakti që ata dalin dhe thonë ‘Rama në burg’ dhe ‘Berisha në burg’, tregon se kërkojnë ndryshimin e sistemit politik. Bëhet fjalë kryesisht për të rinj, pjesë e gjeneratës Z dhe milenialëve, të cilët organizohen dhe komunikojnë përmes rrjeteve sociale”, u shpreh ai.
Kulla tha se vazhdimësia e protestave për më shumë se dhjetë ditë duhet të shërbejë si sinjal për institucionet që të hapin dialog me qytetarët.
“Këta njerëz kanë më shumë se dhjetë ditë në shesh. Për mendimin tim, po të isha në vend të Ramës, do të hapja një dialog për rregullat e lojës. Debati mund të niste pikërisht nga çështja e Zvërnecit”, deklaroi ai.
Ai rikujtoi edhe premtimin e hershëm për një ligj mbi referendumin, duke propozuar që çështja e Zvërnecit t’i nënshtrohet vullnetit të qytetarëve.
“Kur ishte kryeministër në vitin 2017, Rama premtoi se do të miratohej një ligj për referendumin. Le të zhvillohet një referendum dhe të shihet nëse qytetarët e mbështesin apo jo projektin për Zvërnecin”, tha Kulla.
Sipas tij, çdo veprim i njëanshëm apo arrogant nga politika vetëm sa mund ta zgjasë dhe ta forcojë protestën.
“Çdo veprim arrogant që bëhet, vetëm sa e mban protestën në shesh. Shumë prej atyre që protestojnë kanë shqetësime të ndryshme me shtetin, por janë bashkuar rreth kësaj kauze për të shprehur pakënaqësitë e tyre”, përfundoi Kulla.
