Ministri në detyrë i Infrastrukturës, Dimal Basha ka reaguar ndaj deklaratave të kryetarit të Prishtinës, Përparim Rama, lidhur me projektet infrastrukturore në kryeqytet dhe financimin e tyre.
Sipas Bashës, pretendimet se Qeveria nuk po mbështet Prishtinën nuk qëndrojnë, duke theksuar se në disa projekte të rëndësishme infrastrukturore kontributi qeveritar është i konsiderueshëm.
Ministria ka bërë të ditur se vetëm për rrugën “Abedin Dino”, që lidh Sofalinë me Kolovicën, vlera e projektit është 2.5 milionë euro, prej të cilave 1.5 milionë euro janë financim nga Qeveria.
Po ashtu, për vazhdimin e rrugës “Bajram Bahtiri” me katër korsi, me vlerë 2.5 milionë euro, financimi qeveritar arrin në 1.4 milionë euro.
Një tjetër projekt i përmendur është kyçja në rrethin e Lakrishtës, që lidh Unazën e Qytetit me rrugën Prishtinë–Fushë Kosovë–Mitrovicë dhe rrethrrotullimin e Lakrishtës, me vlerë prej 4 milionë euro, ku 1.4 milionë euro janë investim nga Qeveria.
Sipas të dhënave të prezantuara nga Ministria e Infrastrukturës, vetëm për këto tri projekte vlera totale arrin rreth 9 milionë euro, ndërsa kontributi qeveritar është rreth 4.3 milionë euro, apo rreth 47 për qind e shumës totale.
Basha ka theksuar se këto projekte janë nënshkruar gjatë vitit 2024 dhe janë pjesë e investimeve të përbashkëta me Komunën e Prishtinës.
