Mes lulkuqeve është ky kanal i ujitjes.
Në Lupç të Poshtëm, u ndërtua ky kanal, i cili do të jetë nën kontroll të banorëve.
Në këtë mënyrë, sipas nevojës së tyre do të mund ta lëshojnë ujin për të kaluar përgjatë kanalit.
Ky sistem i ujitjes po mirëpritet nga ata që punojnë tokat.
“Na vijnë shumë t’mira prej këtij projekti, se mundemi tash e tutje m’i ujit krejt arat, me misër, me grurë, patate, speca e me të gjitha. Edhe pse ka ekzistu ma herët, po kohën e fundit është dëmtu shumë, shumë rrallë ka ardhë. Tash është shumë mirë, na kanë pshtu me këtë kanal të ujitjes”, shprehet Blerim Berisha – banor.
Për banorët dhe punuesit e tokës, ndërtimi i këtij kanali sjellë shumë lehtësira.
“Këtu janë diku katër lagje, diku mbi 100 hekatër tokë. Përpara e kemi mbajtë vet, me forcat tona. U bojshim katër lagjet bashkë, edhe fillojshim atje poshtë dhe këtu nalt, me lëshu ujin. Mirëpo që një kohë nuk kemi pasë mundësi, nuk ka punëtorë. Kështu që erdh puna, e fort mirë u bë. Është sukses i madh, na vyn shumë, ujiten përmbi 100 hektarë”, thotë Mustafë Kaçiu.
Të mërkurën ky kanal u përurua nga ministri në detyrë i Bujqësisë e kryetari i komunës së Podujevës.
Mirëpo, ai nuk është i përfunduar ende plotësisht.
“Uji lëshohet nga diga, sipas nevojës dhe kërkesës së fermerëve. Mekanizmin e ka që lëshohet sasia më e madhe, më e vogël. Dje ka qenë sasia më e vogël pasi nuk është përfundu hala projekti komplet, nuk është bërë pranimi teknik, s’u përfundu në tërësi. Por vetëm një sasi e vogël e ujit për me bo testin dhe ka funksionu shumë mirë”, u shpreh Mahmut Ajvazi – menaxher i projektit.
Ndërtimi i këtij kanali, ishte si projekt i komunës së Podujevës, por që realizimi i tij u mundësua nga mbështetja e Ministrisë së Bujqësisë, Pylltarisë dhe Zhvillimit Rajonal.
