Kryetari i Partia Demokratike e Kosovës dhe kandidati për kryeministër, Bedri Hamza, ka prezantuar zotimin e katërt të programit të tij qeverisës, i fokusuar në reformimin dhe modernizimin e sistemit arsimor në Kosovë.
Në një konferencë për media, Hamza theksoi se arsimi do të jetë prioritet kombëtar për një qeveri të udhëhequr nga PDK, duke e cilësuar atë si themel për zhvillimin e vendit.
“Arsimi nuk është shpenzim. Arsimi është investimi më i sigurt që një shtet mund të bëjë për të ardhmen e vet. Prandaj, më 7 qershor, ne kërkojmë besimin e qytetarëve për të ndërtuar një sistem arsimor modern, cilësor dhe konkurrues,” tha Hamza.
Ai shtoi se përmes këtij programi synohet që të rinjtë të pajisen me njohuri dhe aftësi që u mundësojnë të ndërtojnë të ardhmen e tyre në Kosovë. Sipas tij, në qendër të këtij vizioni është rinia dhe krijimi i mundësive konkrete për ta.
Ndër premtimet kryesore, Hamza veçoi themelimin e një fondi bursash prej 30 milionë euro në vit për studentët.
“Për herë të parë do të krijojmë Fondin e Bursave për Studentët me vlerë prej 30 milionë euro në vit. Ky fond do të garantojë mbështetje të drejtpërdrejtë për studentët, pavarësisht gjendjes së tyre ekonomike apo sociale,” u shpreh ai.
Po ashtu, ai premtoi forcimin e autonomisë universitare, mbështetje për kërkimin shkencor dhe zgjerim të bashkëpunimit ndërkombëtar me universitete prestigjioze.
“Ne duam universitete që jo vetëm japin diploma, por prodhojnë dije, inovacion dhe zgjidhje për zhvillimin e vendit,” deklaroi Hamza.
Një tjetër fokus i programit është edhe modernizimi i arsimit profesional dhe lidhja e tij me tregun e punës.
“Shkollat profesionale do të pajisen me infrastrukturë moderne, ndërsa bizneset do të përfshihen aktivisht në procesin e edukimit praktik të nxënësve. Qëllimi ynë është i qartë: më shumë aftësi profesionale, më shumë vende pune dhe më shumë mundësi për të rinjtë,” tha ai.
Në fund, Hamza ftoi qytetarët të marrin pjesë në tubimin përmbyllës të fushatës.
“Kosova meriton më shumë. Dhe, Kosova do të ndryshojë. Do ta ndryshojmë ne,” përfundoi ai.
