Gjykata Supreme e ka refuzuar kërkesën për mbrojtje të ligjshmërisë e paraqitur nga mbrojtësi i të akuzuarit Orges Zhugolli, avokati Naim Rudari, duke lënë kështu në fuqi dënimi me 17 vjet burgim për vrasjen në Gllamnik të Podujevës shkaku i konfliktit në komunikacion.
Sipas aktakuzës, Orges Zhugolli ngarkohej se më 12 shtator 2023 në Gllamnik të Podujevës, kishte privuar nga jeta tani të ndjerin A.Zh., për shkak të një konflikti që kishin pasur në komunikacion, raporton “Betimi për Drejtësi“.
Gjykata Themelore në Prishtinë, më 4 qershor 2025, e kishte shpall fajtorë për veprën penale të “Vrasjes” të akuzuarin Zhugolli, duke e dënuar me 20 vjet burgim, kurse e kishte liruar për armëmbajtje pa leje. Ndërkaq Apeli kishte marrë vendim, me të cilin ia kishte zbutur dënimin nga 20 në 17 vjet burgim.
Vendimi i Gjykatës Supreme, i përpiluar më 5 maj 2026, është marrë nga kolegji i gjyqtarëve i përbërë nga Agim Maliqi- kryetar, Burim Ademi dhe Bashkim Hyseni- anëtarë.
Sipas vendimit të Supremes, avokati Rudari paraqiti kërkesë për mbrojtje të ligjshmërisë ndaj vendimit të Themelores dhe atij të Apelit, për shkak të shkelje se Ligjit Penal, shkeljeve esenciale të dispozitave të procedurës penale dhe shkeljeve tjera të dispozitave të procedurës penale, me propozim që lënda të kthehet në rigjykim.
Përgjigje në kërkesën e avokatit Rudari ka paraqitur Prokurori i Shtetit, me propozim që kërkesa të refuzohet si e pabazuar.
Sipas Supremes, vendimet e shkallëve më të ulëta nuk janë të përfshira me shkelje esenciale të dispozitave të procedurës penale, nuk janë marrë me shkelje të Ligjit Penal dhe po ashtu nuk janë marrë me shkelje të tjera të dispozitave ligjore që do të mund të ndikonin në ligjshmërinë e aktgjykimeve, rrjedhimisht konstatoi se kërkesa e mbrojtjes është e pabazuar.
Shkalla e tretë thekson se nuk ka rrethana që përjashtojnë përgjegjësinë penale ndaj të dënuarit, dhe se i drejtë është konkludimi i gjykatës së shkallës së parë dhe i Apelit, kur të dënuarin e kanë shpallur fajtor për veprën penale “Vrasje”.
Në vendim të Supremes thuhet se dashja për kryerjen e veprës në rastin konkret, është nxjerrë nga rrethanat e rastit dhe se nuk e gjen të bazuar pretendimin tjetër se pasoja e shkaktuar nuk ka qenë nga veprimet e të dënuarit Zhugolli.
“Gjykata Supreme vlerëson se, siç kanë arsyetuar dy gjykatat e instancave më të ulëta, veprimi i të dënuarit është ndërmarr me dashje”, thuht në vendim.
Gjykata Supreme nuk e gjen të bazuar pretendimin e mbrojtjes se kishte mbrojtje të nevojshme nga veprimet e të dënuarit përballë një sulmi të atëçastshëm e të paprovokuar, pasi që nga provat që janë administruar në shqyrtimin gjyqësor nuk rezulton që tani i ndjeri e kishte sulmuar apo të kishte ndërmarrë ndonjë veprim për të treguar ekzistimin e fillimit të sulmit ndaj Zhugollit.
Gjithnjë sipas vendimit të Supremes, në veprimin e të dënuarit dhe pasojën e shkaktuar, ekziston lidhja shkakore shumë e ngushtë, dhe përmbushen elementet e figurës së veprës penale për të cilën është shpallur fajtor ai.
Supremja ka theksuar se nga aktgjykimi i gjykatës së shkallës së parë nuk paraqitet ndonjë kundërthënie ndërmjet dispozitivit dhe arsyetimit të dhënë, që do të përbënte mëdyshje në zbatimin e dispozitave penale.
Në vendim është theksuar se është i pabazuar pretendimi se vendimi është nxjerrë bazuar në prova të papranueshme e që ndërlidhet me deklarimet e dëshmitarëve, kjo pasi që sipas Supremes, dëshmitarët deklarojnë për rrethanat e dëgjuara, të para, siç ata i përjetojnë dhe perceptojnë zhvillimet në ato rrethana që kanë ngjarë.
Në seancën e 27 majit 2025, Zhugolli u shpall fajtor për veprën penale të “Vrasjes”, ndërsa u lirua nga akuza për “Armëmbajtje pa leje”, për shkak se nuk është provuar se ka kryer veprën penale. Më pas, më 4 qershor 2025, Gjykata Themelore në Prishtinë shpalli aktgjykimin ndaj Orges Zhugollit, duke e dënuar me 20 vjet burgim. Kurse, Apeli ia zbuti dënimin në 17 vjet burgim.
Ndërkaq, sipas aktakuzës së Prokurorisë Themelore në Prishtinë, më 12 shtator 2023 afër marketit “Melis”, që gjendet në fshatin Gllamnik të Podujevës, i pandehuri Orges Zhugolli kishte privuar nga jeta tani të ndjerin A.Zh., për shkak të një konflikti që kanë pasur në komunikacion.
