Kandidati për deputet nga Aleanca për Ardhmërinë e Kosovës, Ahmet Isufi, ka prezantuar programin zgjedhor të partisë së tij gjatë një paraqitjeje në emisionin “Këndi i Debatit” në Tëvë1.
Isufi tha se AAK-ja ka hyrë në fushatë me një program të hartuar nga ekspertë dhe të mbështetur në përvojën qeverisëse që partia ka pasur ndër vite.
“Ne kemi ardhur që t’u tregojmë qytetarëve se në fushatë shpalosen programet politike dhe ajo çfarë u ofrohet qytetarëve në mandatin që partitë pretendojnë ta marrin. Ne kemi një program të përgatitur nga ekspertët dhe kemi dhënë orientimet tona të qarta politike për mënyrën se si do të qeverisim”, tha Isufi.
Ai vlerësoi gjithashtu kandidatin e AAK-së për kryeministër, Ardian Gjinin, duke thënë se ai ka përvojë të gjatë institucionale dhe politike.
“Tani kemi edhe kandidatin për kryeministër, z. Ardian Gjini, i cili ka treguar që nga fillimi një eksperiencë të jashtëzakonshme profesionale dhe politike. Ai e njeh funksionimin e shtetit, ka qenë pjesë e proceseve të rëndësishme politike dhe ka shërbyer edhe si ministër në Qeverinë e Kosovës”, u shpreh Isufi.
Sipas tij, qytetarët kanë nevojë për zgjidhje konkrete dhe jo vetëm për premtime politike.
“Kur pretendojmë të jemi pjesë e qeverisë së Kosovës, mendojmë se duhet t’i japim qytetarëve atë që është në dobi të tyre dhe jo vetëm të merremi me fjalë”, shtoi ai.
Duke folur për programin zgjedhor, Isufi theksoi se AAK-ja e ka ndërtuar atë mbi tri shtylla kryesore: sigurinë, energjinë dhe zhvillimin ekonomik.
“Kur kemi përgatitur programin, kemi krijuar tri shtylla kryesore. E para është siguria e vendit, sepse pa siguri asgjë nuk funksionon. Pikërisht edhe slogani i AAK-së është ‘Siguri, Energji dhe Zhvillim’”, deklaroi ai.
Isufi tha se Kosova duhet të forcojë partneritetin me NATO-n dhe të synojë anëtarësimin në aleancën ushtarake.
“Ne duam që të jemi partnerë të NATO-s dhe pjesë e NATO-s, jo vetëm për të pasur më shumë siguri në Kosovë, por edhe për të kontribuar në sigurinë e rajonit. Synimi ynë është që në të ardhmen Forca e Sigurisë së Kosovës të marrë pjesë edhe në misione ndërkombëtare”, përfundoi Isufi.
