Janë bërë disa muaj prej kur çmimet vazhdojnë të rriten vazhdimisht. Nga ky ndryshim në cmime e pësuan më së shumti qytetarët.
Ata kërkojnë rritje të pagave ose shtesa mujore, duke e konsideruar si të pamjaftueshme shtesën prej 100 eurosh e cila është dhënë nga Qeveria para dy muajsh për disa kategori.
“Kjo është globale nuk është vetëm tek ne pra e ka përfshi të gjithë botën , gjithkush e ka rrit çmimin 100 euro nuk kanë mbet asgjë, çka e kam marrë me një pension para një viti sot nuk mundem me marrë asgjë sepse aq kanë shkuar çmimet”, thotë Hajrullah Gashi, qytetar.
“Duhet me u pajtu edhe mirë nuk është sepse nuk kemi rroga të mira që me i mbulu po ne nuk mundemi me ndal as me i rritë edhe pse janë rritë me tension të lartë. Me pas nje shtesë të rrogës dhe rritje ish kanë më mirë”, thotë qytetari Mustafë Beqiri.
“Na ka mashtru neve Qeveria pra kryeministri me 100 euro, çfarë të bëjmë me 100 euro është desht me na e rritë të paktën 60 euro edhe rrogat me i rritë dhe mos me na mashtru neve. Dy herë i ka dhanë nuk mjafton duhet me bo rritje edhe kanë po sdi pse nuk e bëjnë rritjen”, thotë qytetari tjetër Ismet Fushtica.
E kjo gjendje ekonomike dhe rritja e cmimeve sipas ekonomistit Besnik Avdiaj nuk pritet të ndryshoj edhe për rreth gjysmë viti.
“Rritja e çmimeve nuk do të vazhdojë përjetësisht në këtë formë parashihet në bazë të disa projeksioneve të instituteve kërkimore nga Evropa dhe Shtetet e Bashkuara që do të ketë rritje të vazhdueshme të çmimeve dhe për rreth gjysmë viti, mirpo pas kësaj periudhe parashihet një balancim i inflacionit ku në plan afat gjatë do të rriten dhe të hyrat të cilat duhet ta mbulojnë rritjen e kësaj kostoje pra është një efekt ekonomik spitalor”, thotë Avdiaj.
Sipas Avdiajt çmimet janë më shumë të manipuluara nga bizneset.
“Inflacioni i përgjithshëm është pra reflektim në vendin tonë po deri diku në bazë edhe të raportimit të mediave po del që ka hapsirë të madhe të cilat bizneset po i shfrytëzojnë për manipulim të çmimeve por nuk është normale derisa inflacioni në vendet përëndimore në vendet e BE sillet në norma më të ulta se sa tek ne pra është pasqyrim i manipulimeve që po ndodhin”, shtoi ai.
Përpos shtesave prej 100 eurosh, Qeveria e Kosovës nuk ka dhënë ndonjë alternativë për të ndihmuar qytetarët pas rritjes së cmimeve. Ndërsa edhe sa i përket tërheqjes nga Trust-i, deputetët e pushtetit vazhdojnë të kenë qëndrim kundër.
Kronika e realizuar nga gazetarja Lendrina Kodrolli.
