Synim kanë ta sigurojnë një ulëse në Kuvend.
Por jo të gjithë, janë “të pastër” para ligjit.
25 kandidatë për deputetë në zgjedhjet e 7 qershorit, janë të përfshirë në raste penale.
E prej tyre, 15 janë me aktakuza aktive, gjersa 13 me dënime të formës së prerë, të dhëna këto të publikuara nga Instituti i Kosovës për Drejtësi.
Përfshirja e këtyre kandidatëve në lista zgjedhore, po shihet shqetësuese.
“Kandidimi dhe rikandidimi i kandidatëve të cilët kanë pasur probleme me ligjin është jashtëzakonisht e dëmshme, si për rendin ligjor në Republikën e Kosovës, po ashtu edhe për imazhin e subjektit politik”, thotë politologu Albinot Maloku.
Sipas raportit, numrin më të madh të kandidatëve të përfshirë në raste penale e ka Lëvizja Vetëvendosje me 13 kandidatë, AAK me 2, e PDK e PSD me nga një.
Sipas politologut Maloku, një gjë e tillë nuk është dashur të lejohet nga subjektet politike.
“Subjektet politike është dashur që, që në krye të herës, të mos pranojnë kandidatë të cilët kanë probleme me ligjin dhe kjo kishte me qenë kallëzuesi i parë që këto subjekte politike me të vërtetë duan të kenë lëvizshmëri në vend. Për rrjedhojë, kjo nuk është bërë, sidomos nga Lëvizja Vetëvendosje dhe kjo është jashtëzakonisht e keqe, që në të ardhmen mund të kemi deputetë të cilët janë shembulli më i dëmshëm i respektimit të rendit ligjor në Republikën e Kosovës”, tha ai.
Krahasuar me zgjedhjet e parakohshme të vitit 2025, numri i kandidatëve të përfshirë në raste penale ka rënë nga 27 në 25.
