Kandidati i LVV-së për deputet, Bajram Mavriqi, ka deklaruar se zgjedhjet e 7 qershorit pritet të sjellin një epilog për proceset politike që, sipas tij, po e ngarkojnë vendin.
Ai tha se aktualisht nuk ka një qëndrim të prerë nëse Feride Rushiti do të jetë kandidate për presidente apo nëse do të propozohet ndonjë emër tjetër, duke shtuar se kjo çështje do të bëhet e ditur vetëm pas zgjedhjeve.
“Mendoj që rezultati i zgjedhjeve që do të ndodh më 7 qershor do të japë epilog për të gjitha proceset që po na rëndojnë. Nuk kam ndonjë qëndrim se a do të jetë zonja Feride Rushiti kandidate për presidente apo dikush tjetër, kjo do të dihet pas zgjedhjeve”, deklaroi Mavriqi në emisionin “Ditari” në Tëvë1.
Sipas tij, Lëvizja Vetëvendosje do të jetë serioze në raport me krijimin e institucioneve dhe do t’i respektojë të gjitha afatet kushtetuese për formimin e qeverisë dhe zgjedhjen e presidentes.
“E rëndësishme është që VV do të jetë serioze dhe do t’i respektojë të gjitha afatet kushtetuese që sa më parë të bëhen institucionet e Kosovës, edhe qeveria dhe presidentja”, u shpreh ai.
Mavriqi theksoi gjithashtu se qytetarët po tregojnë më shumë organizim sesa vetë strukturat politike.
“Më shumë janë duke na prirë qytetarët neve në organizim sesa ne qytetarëve si struktura të LVV-së”, tha ai.
Duke folur për synimet politike të subjektit të tij, Mavriqi deklaroi se LVV synon të qeverisë e vetme, duke kritikuar partitë opozitare për mungesë serioziteti.
“Synimi ynë është që të qeverisim vetë, duke pasur parasysh që subjektet e tjera, që tashmë i përkasin opozitës, e kanë dëshmuar në të kaluarën se janë jo serioze dhe nuk e kanë primar as qytetarin as shtetin, por interesa të grupacioneve dhe CV-të e tyre personale”, deklaroi ai./teve1.info/
