Në hyrje u vendosën flamujt amerikanë.
Për ardhjen e tyre, në Luginë u njoftuan edhe me billborde.
E herët në mëngjesi e së martës, në qytetin e Preshevës, për herë të parë arritën dy kongresmenë amerikanë.
Keith Self dhe Suhas Subramanyam në takim u pritën nga përfaqësuesit shqiptarë që jetojnë në Serbi.
Kështu edhe diskutimet e para u bënë në zyrën e Këshillit Kombëtar Shqiptarë.
Takimi zgjati mbi një orë.
E kur dolën, amerikanët para gazetarëve treguan se çka u diskutua brenda.
Kongresmeni republikan, Keith Self tha u njoftuan nga afër me problemet reale të shqiptarëve në Serbi
“Kemi parë se ka probleme reale mes shqiptarëve dhe Serbisë, siç edhe e kemi ditur. Por, do të shkojmë edhe në Kosovë për të mësuar për pakicën serbe atje. Pra,po i vizitojmë të dyja vendet për të kuptuar se si trajtohen pakicat dhe cilat janë të drejtat e tyre”, ka thënë Self .
Pas tij, pyetje pati edhe për demokratin Suhas Subramanyam.
Ky tha se janë njoftuar për problemet kryesore të të drejtave të pakicës.
“Sistemi i arsimit dhe prosperiteti këtu nuk është i njëjtë për shqiptarët dhe serbët. Realiteti është ky: që Serbia të ecë përpara si shtet, dhe t’i bashkohet BE-së, duhet t’i adresoj këto problematika dhe t’u jap të gjithëve mundësi të barabarta”, u shpreh Subramanyam.
Këtë vizitë si historike e pa deputeti shqiptar në Parlamentin e Serbisë, Shaip Kamberi.
Ai tha se kongresmenët janë njoftuar për të gjitha problemet që kanë shqiptarët ndër vite.
E nga këtu, dy amerikanët vizitën e vazhduan me kryetaren e Komunës së Preshevës, Ardita Sinanin dhe kryetarin e Bujanocit, Arbër Pajazitin.
Ndryshe, më 3 dhjetor 2025, kongresmeni Self përmes një projektligji i ka kërkuar Sekretarit Amerikan të Shtetit të përgatisë një raport gjithëpërfshirës për pozitën e pakicave në Serbi me theks të veçantë shqiptarët e Luginës së Preshevës, që jetojnë në jug të Serbisë.
