Deputeti shqiptar në parlamentin e Serbisë, Shaip Kamberi ka thënë se takimi i sotëm me kongresistët amerikanë Keith Self dhe Suhas Subramanyam paraqet një moment me rëndësi të veçantë për shqiptarët e Luginës së Preshevës.
Kamberi ka thënë se ky takim po mbahet, në një kohë kur shqiptarët e Luginës së Preshevës vazhdojnë të jetojnë nën politika diskriminuese dhe përjashtuese nga regjimi në Beograd.
Duke kujtuar për diskriminimin e ndaj shqiptarëve që po bëhet nga Serbia, Kamberi ka thënë se Beogradi kërkon standarde të larta për serbët në Kosovë, të njëjtat standarde refuzon t’i zbatojë për shqiptarët në Luginën e Preshevës.
“Ky dualizëm politik e moral nuk mund të vazhdojë pafundësisht”, ka shkruar ai në Facebook.
Ai poashtu ka thënë se angazhimi amerikan dhe iniciativa për Ligjin HR 6411 në Kongresin Amerikan në mbështetje të Shqiptarëve të Luginës së Preshevës janë me rëndësi të jashtëzakonshme.
“Në Presheva sot nuk kemi folë vetëm për problemet e saj por edhe për nevojën që Ballkani Perëndimor të ndërtohet mbi drejtësi, barazi dhe standarde të njëjta për të gjithë qytetarët.
Simetria në të drejta është konceti politik që garanton paqe afatgjate. Koha e standardeve të dyfishta duhet të marrë fund”, ka shkruar ai.
Kongresistët amerikanë pas vizitës në Luginën e Preshevës do të jenë edhe në Kosovë
