Protestat antiqeveritare në Beograd të shtunën, kanë përfunduar me përleshje mes policisë dhe demonstruesve, raporton AP.
Mijëra qytetarë mbushën rrugët e qytetit duke valëvitur pankarta dhe duke veshur bluza me sloganin “Studentët fitojnë”, motoja e lëvizjes studentore që organizoi tubimin.
Protesta fillimisht nisi në mënyrë paqësore, por situata u përshkallëzua në orët e mbrëmjes, kur grupe demonstruesish hodhën gurë dhe mjete piroteknike drejt forcave të rendit, ndërsa policia ndërhyri për të shpërndarë turmën dhe për të vendosur kontrollin.
Studentët protestues po kërkojnë zgjedhje të parakohshme dhe forcimin e sundimit të ligjit, duke akuzuar qeverinë për korrupsion dhe lidhje me krimin.
Presidenti serb, Aleksandar Vuçiq është përpjekur të frenojë demonstratat masive që po sfidojnë pushtetin e tij.
Ai reagoi të shtunën përmes një videoje të publikuar në Instagram, ku akuzoi protestuesit për sjellje të dhunshme dhe tha se ata “nuk mund t’i durojnë kundërshtarët politikë”.
Megjithatë, Vuçiq theksoi se “shteti po funksionon” dhe se institucionet do të vazhdojnë të veprojnë “në përputhje me ligjin”.
Ndërkohë, kompania shtetërore hekurudhore e Serbisë anuloi të gjitha linjat e trenave drejt dhe nga Beogradi, në atë që u pa si përpjekje për të penguar mbërritjen e protestuesve nga qytete të tjera.
Tubimi i së shtunës është protesta e fundit në një valë demonstratash antiqeveritare që kanë vazhduar prej më shumë se një viti.
Ato nisën pas tragjedisë në Novi Sad më 1 nëntor 2024, kur shembja e tendës së një stacioni hekurudhor la të vdekur 16 persona.
