Xherdan Shaqiri edhe sezonin e ardhshëm do të jetë pjesë e skuadrës së Baselit.
34-vjeçari, që është kapiten i Baselit, ka konfirmuar qëndrimin e tij, duke thënë se ka kontratë deri në vitin e ardhshëm, të cilën do ta respektojë deri në fund.
“Kam edhe një vit kontratë këtu. Pra, gjithçka është e vendosur”, ka thënë shkurt Shaqiri kur është pyetur për të ardhmen e tij.
Megjithatë, Shaqiri nuk është shprehur aspak i kënaqur me rezultatet e Baselit në sezonin aktual, duke thënë se ishin të zhgënjyera.
Baseli e mbylli sezonin me humbje 4:0 në udhëtim te Lugano, duke përfunduar në pozitën e pestë në tabelë.
Shaqiri ishte lojtari kryesor i Baselit, pasi në 47 ndeshje të luajtura në të gjitha garat, ka shënuar 16 gola dhe ka bërë 13 asistime.
