Sulmuesi i Llapit, Arianit Hasani ka fituar epitetin e futbollistit më të mirë për xhiron e fundit në Superligën e Kosovës.
Federata e Futbollit të Kosovës (FFK), ka njoftuar të hënën, se Hasani është shpallur “Ylli i Javës” duke e fituar çmimin për lojtarin më të mirë të xhiros së 34-të.
Komisioni i Veteranëve të futbollit, ka vlerësuar Hasanin si më të mirën pas paraqitjes së tij në ndeshjen Gjilani – Llapi.
Në fakt, Hasani ishte më i merituari për fitoren e Llapit 2:1, pasi shënoi të dy golat kundër Gjilanit për t’i siguruar tri pikë të rëndësishme për ekipin e tij.
Pasi mori çmimin e më të mirit, Hasani është shprehur tejet i lumtur për suksesin e arritur dhe fitoren e skuadrës së Llapit në udhëtim.
Ai pranoi se Llapi kishte synime tjera këtë sezon, por shtoi se shpreson që në fund të sezonit të ikin nga pozita e tetë në tabelë, e cila dërgon në barazh.
Hasani falënderoi bashkëlojtarët dhe trajnerin Tahir Batatina për çmimin e fituar, duke shtuar se shpreson që Llapi të vazhdojë me rezultate pozitive edhe në ndeshjet e ardhshme.
Deri në fund të sezonit aktual, kanë mbetur edhe dy xhiro për t’u zhvilluar, ku Llapi do të përballet me Malishevën në shtëpi dhe Ferizajn në udhëtim.
