Një aksident trafiku ka ndodhur pasditen e sotme në fshatin Prilep të Deçanit, ku janë përfshirë tri automjete dhe për pasojë gjashtë persona kanë mbetur të lënduar.
Sipas Policisë së Kosovës, ngjarja ka ndodhur pasditen e sotme në një rrugë lokale të fshatit.
Zëdhënësi i Policisë për rajonin e Pejës, Driton Rugova, ka bërë të ditur se të lënduarit janë transportuar në Spitalin Rajonal të Pejës për trajtim mjekësor.
Ai ka thënë se njësitet policore kanë dalë menjëherë në vendin e aksidentit dhe kanë nisur hetimet për të sqaruar rrethanat dhe shkaqet që çuan deri te përplasja.
Deri më tani nuk janë dhënë detaje lidhur me gjendjen shëndetësore të personave të lënduar, ndërsa rasti mbetet nën hetim.
