Një person është ndaluar nga Policia në Ferizaj, pasi dyshohet se ka kryer veprat penale “Lëndim i rëndë trupor” dhe “Kanosje”. Ngjarja ka ndodhur të premten në magjistralen Prishtinë–Shkup.
Sipas autoriteteve, i dyshuari me inicialet R.S. fillimisht ka tejkaluar veturën e viktimës A.T. dhe më pas i ka bllokuar rrugën. Pas ndalimit të automjeteve, ai dyshohet se e ka sulmuar fizikisht viktimën, duke i shkaktuar lëndime serioze trupore.
I lënduari është dërguar për trajtim mjekësor në Qendrën Emergjente të Spitalit të Ferizajt, ku ka marrë ndihmën e nevojshme.
Në kuadër të hetimeve, Policia ka intervistuar edhe vajzën e viktimës, e cila është ish-bashkëshortja e të dyshuarit. Ajo ka deklaruar se kishte marrë kërcënime telefonike nga R.S., ndërsa si prova janë dorëzuar dy audio-incizime ku dëgjohen kërcënimet e pretenduara.
Policia njofton se i dyshuari është intervistuar në prani të avokatit të tij mbrojtës dhe ka pranuar veprat për të cilat po hetohet.
Me vendim të prokurorit të shtetit, ndaj tij është hapur rast për “Lëndim të rëndë trupor” dhe “Kanosje”, ndërsa i dyshuari është dërguar në mbajtje për 48 orë.
