Organizata e Veteranëve të Luftës së UÇK-së ka mbajtur sot një takim urgjent në Skenderaj, ku janë shqyrtuar, siç thuhet në reagimin e tyre, “ngjarjet e fundit dhe përkeqësimi i klimës së sigurisë” në vend.
Në deklaratën e lëshuar pas takimit, veteranët kanë reaguar ashpër ndaj angazhimit të njësive speciale të Policisë në një rast që ata e kanë cilësuar si “zënkë të zakonshme pa pasoja të rënda”, duke e konsideruar këtë veprim si të panevojshëm dhe shqetësues.
“Strukturat e sigurisë së Republikës ekzistojnë për të mbrojtur qytetarët dhe rendin kushtetues, e jo të marrin pjesë në shtetrrethime e ngjallje të frikës”, thuhet në reagim.
OVL e UÇK-së u ka bërë thirrje pjesëtarëve të Policisë së Kosovës që të veprojnë në përputhje me Kushtetutën dhe ligjet e vendit, duke theksuar se mandati i tyre nuk duhet të ndikohet nga “urdhrat qeveritarë në dobi të skenarëve të porositur nga Albin Kurti dhe banda e tij”.
Në deklaratë thuhet gjithashtu se “nëse uniforma e Kosovës kthehet në instrument për të vendosur tiraninë e regjimit, atëherë përveç urdhërdhënësve, përgjegjësia bëhet edhe personale”.
Veteranët kanë deklaruar se do të kundërshtojnë “me çdo mjet” çdo përpjekje që, sipas tyre, cenon demokracinë dhe rendin kushtetues në vend.
“Diktatura mori fund në qershor të vitit 1999. Kushdo që tenton ta vërë këtë realitet në provë, le të urdhërojë. Këtu jemi”, përfundon reagimi i OVL-së së UÇK-së./teve1.info/
