Eksperti i sigurisë, Korab Blakaj ka vlerësuar se aktakuza ndaj togerit të policisë, Bojan Jevtiq përbën një nga rastet më serioze të dyshuara të spiunazhit në Kosovë që nga shpallja e pavarësisë, duke theksuar se ky zhvillim tregon rritjen e kapaciteteve të institucioneve të sigurisë së vendit.
Në analizën e tij, Blakaj thekson se rasti nuk duhet parë vetëm si çështje individuale penale, por si dëshmi e përpjekjeve të vazhdueshme të Serbisë për të depërtuar në institucionet e Kosovës përmes operacioneve të inteligjencës dhe luftës hibride.
Sipas tij, Beogradi prej vitesh ka përdorur metoda të ndryshme destabilizuese ndaj Kosovës, përfshirë propagandën, dezinformimin, strukturat paralele dhe rrjetet e inteligjencës të lidhura me BIA.
Blakaj vlerëson se aksioni i realizuar më 17 korrik 2025 nga Agjencia e Kosovës për Inteligjencë, Prokuroria Speciale e Kosovës dhe Inspektorati Policor i Kosovës nuk ka qenë rastësor, por rezultat i një pune të gjatë profesionale kundërzbulimi.
Sipas analizës, pozita e Jevtiqit në Policinë Kufitare e bënte rastin veçanërisht sensitiv për sigurinë kombëtare, pasi dyshohet se ai kishte qasje në informacione operative dhe dokumente të klasifikuara.
Eksperti i sigurisë thotë se zbulimi dhe arrestimi i personave të dyshuar për bashkëpunim me inteligjencën serbe tregon se Kosova ka hyrë në një fazë të re të mbrojtjes institucionale dhe të luftimit të infiltrimeve të huaja.
Në fund, ai vlerëson se rasti “Jevtiq” përbën jo vetëm goditje ndaj rrjeteve të inteligjencës serbe, por edhe dëshmi të forcimit të shtetit të Kosovës dhe të kapaciteteve të tij për të mbrojtur rendin kushtetues dhe sigurinë kombëtare.
“Institucionet e sigurisë po tregojnë maturi, profesionalizëm dhe efikasitet në rritje. AKI po shfaqet si një institucion serioz me kapacitete reale monitorimi dhe zbulimi. Prokuroria Speciale po tregon vendosmëri për t’i çuar rastet deri në fund. Policia dhe Inspektorati Policor po dëshmojnë se askush nuk është mbi ligjin, pavarësisht pozitës apo përkatësisë. Ky është standard shtetëror europian”, thuhet në njoftim. /teve1.info/
