Një zyrtar i Agjencisë së Pyjeve të Kosovës është arrestuar nën dyshimin për keqpërdorim të pozitës zyrtare dhe përfshirje në kontrabandë me dru në fshatin Shahiq të Kamenicës.
Sipas njoftimit të Policisë së Kosovës, rasti është zbuluar të mërkurën gjatë një patrullimi rutinë në zonën kufitare, kur policia ka ndaluar një kamion të drejtuar nga një shtetas kosovar, i cili transportonte dru që dyshohet se ishin futur nga territori i Serbisë në Kosovë.
Gjatë verifikimit të dokumentacionit përcjellës, hetuesit kanë ngritur dyshime se i dyshuari kishte bërë damkosjen e druve në mënyrë të kundërligjshme, si dhe kishte lëshuar dokumentacion për transportin e tyre.
Me urdhër të prokurorit kompetent, ngarkesa me dru është sekuestruar si provë materiale, ndërsa zyrtari i dyshuar është arrestuar dhe është dërguar në mbajtje për procedura të mëtejme hetimore. /tev1.infi.
