Natyra Kuçi nga Partia Socialdemokrate ka deklaruar se subjekti i saj politik ka vendosur t’i hyjë garës në zgjedhjet e parakohshme parlamentare, të cilat pritet të mbahen më 7 qershor, pasi sipas saj opozita aktuale vetëm po e forcon kryeministrin në detyrë, Albin Kurti, dhe “pushtetet autoritare”.
Në emisionin “Info Nata” në Tëvë1, Kuçi është shprehur se Kosova ka nevojë për një opozitë të vërtetë dhe vetëmohuese, e cila sipas saj e kupton se një pushtet autoritar nuk rrëzohet përmes marrëveshjeve politike tradicionale.
“I kemi hyrë garës në këto zgjedhje për t’i treguar Kosovës që opozita si kjo vetëm e forcon Kurtin dhe pushtetet autoritare dhe se vendi ka nevojë për një opozitë të vërtetë që është vetëmohuese dhe e kupton sesi një pushtet autoritar nuk rrëzohet duke shkuar në takime 15 herë e duke shikuar me nda pushtetin dhe me bë marrëveshje klasike”, ka deklaruar Kuçi.
E pyetur pse PSD-ja ka ndalur kritikat ndaj Kurtit dhe është fokusuar më shumë te opozita, ajo ka thënë se rruga për ndryshimin e pushtetit kalon përmes ndryshimit të opozitës aktuale.
Sipas saj, një opozitë “e fjetur”, që në momentet e fundit bën koalicione për ndarje pushteti, nuk mund ta rrëzojë Kurtin.
“Besoj që për gjashtë vjet, kushdo në Kosovë e ka kuptuar për çka qëndron PSD-ja. Sa herë që kemi bërë aksione, qoftë për rritjen e çmimit të rrymës, për Këshillin Prokurorial, për stikersat apo për shumë tema të tjera, në të cilat shpesh edhe jemi arrestuar, të gjitha këto kanë qenë kauza që PSD i konsideron të rëndësishme dhe përmes të cilave ka treguar pse mendon se ky pushtet dëshiron ta kap secilin bord dhe secilën pore të shtetit. Mirëpo, ajo për çka nuk kemi folur aq sa duhet ka qenë opozita. Për ne, rruga për ta ndryshuar këtë pushtet është përmes ndryshimit të kësaj opozite. Një opozitë e tillë, e fjetur, që në momentet e fundit bën koalicion në Prishtinë për ta ndarë pushtetin, nuk mund ta rrëzojë Kurtin”, ka thënë Natyra Kuçi.
