Jashari thotë se projektligji për deklarimin e pasurisë është dashur që të vlejë për ata që janë në pozita udhëheqëse dhe kanë pozita të larta menaxhuese.
“Nuk më duket shumë e arsyeshme që mjekët dhe profesorët universitar ta deklarojnë pasurinë, eventualisht është dashur të vlejë për ata që janë në pozita udhëheqëse dhe kanë pozita të larta menaxhuese dhe kanë nëpër duar të tyre çështje shumë të rëndësishme apo që i menaxhojnë paratë publike”, tha ai në emisionin “Info Nata” në Tëvë1.
Sipas tij, për AKK-në do të jetë ngarkesë e madhe deklarimi i pasurisë së një kategorie shumë të madhe të njerëzve.
“Përndryshe një kategori shumë e madhe e njerëzve nuk e shoh të arsyeshme dhe do të jetë ngarkesë edhe për Agjencinë Kundër Korrupsionit dhe sigurisht këto janë tendenca për të moslejuar, njëfarë preventive që në të ardhmen mos të korruptohen disa kategori të caktuara. Mirëpo nuk e mendoj që kjo është mënyra më e mirë”, ka deklaruar Jashari.
Ai është shprehur duke thënë se pse duhet ta deklarojë një doktor pasurinë i cili punon me djersë e nuk ka pozitë udhëheqëse.
“Pse duhet ta deklarojë një doktor pasurinë i cili punon me punën e tij dhe djersën e tij, nuk ka pozitë udhëheqëse, nuk punon me para publike, nuk është si një gjyqtar që gjithë ditën ka punë me palë”, tha më tej Jashari. /teve1.info/
