Kryetari i Komunës së Prishtinës, ka publikuar fotografinë e përbashkët me drejtorët e rinj, që vijnë edhe nga PDK pas koalicionit të zyrtarizuar javën e kaluar.
Rama ka thënë se do të funksionojnë si “një ekip i vetëm për t’i vazhduar projektet madhore të Prishtinës dhe për t’i dhënë Kryeqytetit drejtimin që meriton”.
“Vizioni për Prishtinën e së ardhmes është i qartë, një kryeqytet modern, funksional dhe dinjitoz për të gjithë. Së bashku me këtë ekip, do të vazhdojmë ta shndërrojmë këtë vizion në punë konkrete dhe rezultate të prekshme.
Përtej dallimeve politike, qëllimi dhe angazhimi ynë është i përbashkët, të punojmë me përgjegjësi, unitet dhe vizion për zhvillimin e Kryeqytetit dhe për të ardhmen që meritojnë qytetarët e këtij vendi”, ka shkruar Rama.
