Rrezarta Krasniqi, nga LDK ka bërë të ditur se nuk do të jetë kandidate për deputete në zgjedhjet e ardhshme.
Përmes një postimi në Facebook, ajo tha se vendimi ka ardhur pas diskutimeve dhe reflektimeve personale, por theksoi se përkushtimi i saj ndaj LDK-së mbetet i pandryshuar.
“Pas shumë diskutimeve dhe reflektimeve personale, kam vendosur që kësaj here të mos jem pjesë e garës për kandidate për deputete”, ka shkruar Krasniqi.
Ajo ka falënderuar strukturat e LDK-së në Vushtrri dhe në gjithë Kosovën për mbështetjen dhe besimin ndër vite.
“Falënderoj pafundësisht strukturat e LDK-së në Vushtrri dhe në gjithë Kosovën për mbështetjen, respektin dhe besimin e vazhdueshëm ndër vite. Për mua, kjo ka qenë gjithmonë vlera më e madhe politike dhe njerëzore”, thuhet në reagimin e saj.
Krasniqi ka theksuar se do të vazhdojë angazhimin politik si nënkryetare e degës së LDK-së në Vushtrri, me fokus në forcimin e partisë dhe rikthimin e besimit qytetar.
“Si nënkryetare e degës në Vushtrri, do të vazhdoj të punoj pa u ndalur për fitoren e LDK-së, për forcimin e strukturave tona dhe për rikthimin e besimit qytetar tek vizioni rugovian që i duhet Kosovës më shumë se kurrë”, ka deklaruar ajo.
Tutje, ajo shtoi se megjithëse nuk do të jetë pjesë e listës zgjedhore, do të vazhdojë kontributin e saj politik në kuadër të LDK-së.
“Edhe pse kësaj here nuk do të jem pjesë e listës zgjedhore, përkushtimi im ndaj LDK-së mbetet i palëkundur”, ka shkruar Krasniqi.
