Të dielën me duartrokitje u pritën në “Tubimin e Bashkimit”
E rikthimin e Vjosa Osmanit në Lidhjen Demokratike të Kosovës, kryetari Lumir Abdixhiku e priti në këtë mënyrë.
Por, duket se jo të gjithë, iu gëzuan rikthimit të ish-presidentes në LDK.
Kjo pasi të dielën në bashkimin e të djathtës munguan disa figura kyçe të partisë.
Bëhet fjalë për Kujtim Shalën, Hykmete Bajramin, Avdullah Hotin e Janina Ymeri.
Kjo e fundit, për Tëvë1, e ka mohuar se ka përçarje të reja brenda partisë më të vjetër në Kosovë.
“Nuk ka përçarje brenda LDK-së, në tubimin e radhës do të marrë pjesë. Ne do të jemi me një listë për kandidat për deputet”, tha Ymeri.
Por, ndryshe nga Ymeri, zhvillimet po i komentojnë analistët politik.
Profesori universitar, Avdi Smajljaj, thotë se situata brenda LDK-së, mbetet ende konfuze.
“Mendoj që të dy palët, edhe këta si figura brenda LDK-së dëmtohen tek votat të cilat mund të vijnë nga ata të cilët mund të kenë shpresa te rikthimi i Vjosa Osmanit por edhe votat që mund të i sjellin nga këto figura brenda LDK-së mund të mungojnë në votat e përgjithshme të LDK-së, kjo është një humbje e dyanshme dhe reflekton një gjendje goxha konfuze brenda partisë për shkak të këtij kapërcimi të madh që është bërë nga një grupim politik pastaj në një tjetër”, vlerëson ai.
Smajlaj shton se rregullimi i raporteve, varet nga rezultati zgjedhor i 7 shkurtit.
“E vetmja gjë që mund të i ulte këto rivalitete brenda LDK-së është një fitore e madhe e LDK-së, ku nga ai pushtet që mund të i sillte ajo fitore mund të përfitonin që të gjithë pastaj, dhe ne e dimë që kur është në pyetje pushteti politikanët e harrojnë edhe vetveten si dhe i harrojnë edhe qytetarët e kështu me radhë kjo do të ishte njëra nga mënyra që mund të i ulte rivalitetet”, shprehet profesori universitar.
Ndryshe, ish-presidentja Vjosa Osmani në zgjedhjet e vitit 2021 ishte në listë të përbashkët me Lëvizjen Vetëvendosje.
Ndërsa raportet me Kurtin u prishën, kur ky i fundit nuk e rikandidoj Osmanin për një mandat të dytë si presidente e vendit.
