Për administratën shtetërore, vikendi nisi të premten.
1 maji qe pushim, kryesisht për ata që janë në punë të shtetit.
E tri ditët e pushimit, shumë prej tyre zgjodhën t’i kalojnë jashtë vendit.
Mbi 175 mijë qytetarë, kaluan përmes pikave kufitare në vendet e rajonit, vetëm në tri ditët e para të majit.
Pika me e frekuentuar qe ajo me Shqipërinë, ku brenda këtyre ditëve, afro 94 mijë qytetarë, kaluan matanë kufirit.
Statistika të ngjashme mund të shënohen edhe këtë vikend, pasi këtë herë e hëna është ditë pushimi, për shkak të Ditës së Evropës.
E dalja masive e qytetarëve sipas ekonomistëve, nënkupton një shpenzim enorm të parasë në vende të tjera.
“Shkuarja e 90 mijë qytetarëve vetëm në Shqipëri vetëm të kushtonte 100 euro i bie 9 milionë euro, nëse i kemi 200 mijë, janë 20 milionë euro dhe në këtë drejtim po të mbeteshin në Kosovë para të tilla ka pasur mundësi të kemi një hoteleri më aktive, turizëm më atraktiv”, thotë ekonomisti, Safet Gërxhaliu.
Kjo më pas thuhet se ka ndikim goxha të rëndë në ekonominë vendore.
“Ne shohim që kemi një numër të lartë të vizitorëve që të paktën një shumë simbolike të parave mbetet në vendet fqinjë pavarësisht që ne i konsiderojmë si vende mike, por ekonomia e vendit tonë po varfërohet për aq para”, thotë ekonomisti tjetër, Fidan Qerimi.
Por pavarësisht dëmit në ekonomi, vlerësohet se kjo ikje është edhe rezultat i zhvillimeve politike në vend.
“Situata politike në Kosovë duke dominuar agjenda politike po e krijon një ambient toksik ku njerëzit janë të lodhur dhe e shfrytëzojnë çdo mundësi për të dalë nga ky rreth qe e ka kapluar shoqërinë kosovare”, tha Gërxhaliu.
Në kalendarin e festave zyrtare janë të listuara gjithsej 12 ditë pushimi.
