Në prag zgjedhjesh, fokusi është kthyer kah diaspora.
Liderë partiak e kandidatë për deputetë, me videomesazhe kanë nisur t’i drejtohen mërgatës që të bëhen pjesë e zgjedhjeve të jashtëzakonshme të 7 qershorit.
Por vëmendja ndaj tyre vetëm në kohë fushate, po shihet më shumë si blerje votash e jo përkrahje ndaj tyre.
“Është e vërtetë që flitet më shumë për diasporën në periudhë zgjedhjesh dhe kjo tregon që partitë politike në Kosovë nuk e shohin diasporën si një potencial dhe aset zhvillimi por më shumë si elektorat dhe një fuqi votuese të cilën duhan ta kapitalizojnë sa herë që kemi zgjedhje”, thotë Lirim Krasniqi nga Organizata “Germin”.
Për më tepër, sipas njohësve të fushës, retorika politike ndaj mërgatës po krijon edhe ndarje mes qytetarëve.
“Pa fillu fushata elektorale ka filluar fushata e mashtrimit politik të mërgatës, dhe çka po ndodh me popullin e Kosovës, d.m.th në po nënçmohemi prej një elite politike që sy e vesh i ka diaspora që po e përçan”, thotë analisti, Florent Zeqaj.
Derisa vlerësohet se kësaj here edhe pjesëmarrja e diasporës në zgjedhje do të jetë shumë më e ulët, për disa arsye.
“Me 7 qershor konsideroj që nuk do të kemi pjesëmarrje aq të lartë siç kemi pasur me 28 dhjetor, kjo për faktin që 7 qershori nuk koincçdon me datë pushimesh, dhe gjithashtu afatet për regjistrim jashtë Kosovës janë shumë më të shkurtra krahasuar me zgjedhjet e rregulla të shkurtit të vitit të kaluar”.
Vetëm për dy ditët e para nga hapja e afatit për votim nga vendet jashtë Kosovës, sipas Komisionit Qendror të Zgjedhjeve, janë regjistruar mbi 21 mijë kërkesa.
Për të votuar qoftë me postë apo votim në përfaqësi diplomatike, afati përfundon më 17 maj.
