Konsulenti politik, Xhevdet Pozhari, ka komentuar zhvillimet brenda Lidhjes Demokratike të Kosovës (LDK), duke vlerësuar se kryetari i Prishtinës, Përparim Rama, aktualisht gëzon më shumë legjitimitet brenda partisë sesa vetë kryetari i saj, Lumir Abdixhiku.
Sipas Pozharit, fakti që Rama ka fituar dy herë radhazi në kryeqytet i jep atij një peshë më të madhe politike në raport me Abdixhikun, i cili sipas tij nuk ka arritur ende ndonjë fitore zgjedhore gjatë periudhës së udhëheqjes së partisë.
Ai shton se nëse Rama do të aktivizohej më drejtpërdrejt në politikën partiake, pozita e tij brenda LDK-së do të forcohej edhe më shumë.
“Përparim Rama si fitues për dy herë radhazi i kryeqytetit ka legjitimitet më të madh brenda LDK-së sesa Lumir Abdixhiku, i cili përgjatë kësaj periudhe nuk ka pasur asnjë fitore. Nëse në ndonjë moment Rama aktivizohet në politikë dhe bëhet pjesë e LDK-së, sidomos nëse Abdixhiku për herë të tretë nuk arrin një rezultat që është duke e pritë, atëherë Rama ka më tepër legjitimitet”, deklaroi ai në emisionin “Këndi i Debatit” në Tëvë1.
Pozhari ka kritikuar edhe stilin e udhëheqjes së Abdixhikut, duke e përshkruar atë si një lider që, sipas tij, nuk del në vijën e parë të betejave politike.
Sipas tij, në zgjedhjet komunale Abdixhiku është “fshehur” pas Përparim Ramës, ndërsa në garat aktuale, sipas tij, mbështetet në figura të tjera politike si Vjosa Osmani.
“Abdixhiku është një liderë që mundohet të stoliset me pupla të huaja, me sukseset e të tjerëve. Edhe në kohën e zgjedhjeve komunale fshihej pas Përparim Ramës, tash në kohën e zgjedhjeve fshihet pas figurës së Vjosa Osmanit – nuk të lë përshtypjen e një lideri që del në ballë të betejës, por gjithmonë bë kalkulime të tilla”, tha Pozhari. /teve1.info/
