Studiuesi i filozofisë politike, Latif Mustafa, ka komentuar zhvillimet aktuale në skenën politike në Kosovë, duke vënë theksin te fushata zgjedhore dhe dinamikat mes partive kryesore.
Ai ka kritikuar Lidhjen Demokratike të Kosovës (LDK) për siç e ka quajtur, mungesë konsistence në qasjen e saj politike, duke përmendur edhe rastin e kryetarit të Prishtinës, Përparim Rama.
Sipas tij, elektorati kërkon qëndrime të qarta nga liderët politikë dhe jo pozicione të paqarta.
“Në këtë fushatë, përshtypje po më bënë inkonsistenca e LDK-së, rastin e Përparim Ramës. Në këtë rast, LDK-ja ka shfaq një dobësi që nuk e ka sulmuar me krejt makinerinë që e ka Rama. Duhet të tregosh liderizëm. Elektorati në këto zgjedhje nuk dëshiron lider që nuk është ‘as mish e as peshk’ ose ‘mbaje e mos e këput’, nuk shkon kështu, duhet të tregosh qëndrim. Duhet të godasësh ‘Përparim Rama nuk është me mua, është tradhtar’. Përparim Rama në koalicion me PDK-në e dëmton shumë LDK-në dhe pamundësia për ta goditur Vjosa Osmanin se tashmë kjo veçse e ka marr hovin e godasin LDK-në që votat e saj të shkojnë teposhtë”, deklaroi ai në emisionin “Këndi i Debati” në Tëvë1.
Mustafa ka komentuar edhe raportet mes partive të tjera, duke thënë se përplasjet politike po intensifikohen, sidomos në raport me Vjosa Osmanin dhe Lëvizjen Vetëvendosje.
Ai thekson se, sipas tij, garat politike po fokusohen gjithnjë e më shumë te figurat kryesore dhe jo vetëm te partitë.
Ai thotë se risi në këto zgjedhje është beteja mes LVV-së dhe Vjosa Osmanit, pasi që është konkurrentja e vetme e garës.
“Paniku shihet tashmë te kampi i PDK-së. PDK-ja ka nis të gjuajë sulme drejt Vjosës, VV-ja ka qenë prej fillimit, sepse betejën e ka me të. VV e di që personi i vetëm që e ka konkurrent në këto zgjedhje është Vjosa Osmani, pasi që këta të tjerët i ka mundur që shumë herë. Me Vjosa Osmanin përballet për herë të parë. Kësaj here, është e re diçka edhe për VV-në, madje edhe për neve si qytetarë”, deklaroi Mustafa. /teve1.info/
