Prokuroria Themelore në Prishtinë, përkatësisht Departamenti për Krime të Rënda – Njësiti për Krime Ekonomike dhe Korrupsion, në bashkëpunim me Inspektoratin Policor të Kosovës (IPK) dhe Drejtorinë për Hetimin e Krimeve Ekonomike dhe Korrupsion, ka zhvilluar sot në orët e hershme të mëngjesit dy aksione në Prishtinë, Fushë Kosovë dhe Obiliq.
Si rezultat i operacionit, janë ndaluar gjashtë persona me inicialet F.S., L.R., N.S., A.I., A.Sh. dhe B.B. për 48 orë, nën dyshimin për përfshirje në disa vepra penale që lidhen me korrupsionin dhe keqpërdorimin e detyrës zyrtare.
“Si rezultat i këtij operacioni, në bashkëpunim me Policinë e Kosovës dhe Inspektoratin Policor, me urdhër të Prokurorit të Shtetit janë ndaluar (6) persona me inicialet F.S., L.R., N.S. A.I., A.Sh., dhe B.B. prej 48 orësh, për shkak se të njëjtit dyshohen për kryerjen e veprave penale: ‘’Keqpërdorimi i pozitës apo autoritetit zyrtar’’, ‘’Keqpërdorimi i informatës zyrtare’’, ‘’Mashtrimi’’, ‘’Legalizimi i përmbajtjes së rreme’’, ‘’Deklarimi i rremë nën betim’’, ‘’Marrja e ryshfetit’’, ”Dhënia e ryshfetit”, ‘’Marrja e deklaratave me anë të shtrëngimit’’, si dhe ‘’Shkelja e fshehtësisë së procedurës’’”, thuhet në njoftimin e Prokurorisë.
Në kuadër të aksionit, autoritetet kanë sekuestruar dy vetura në vlerë rreth 80 mijë euro, një orë dore të markës Rolex me vlerë rreth 8 deri në 10 mijë euro, pesë telefona celularë dhe dokumente të ndryshme që do të përdoren si prova materiale në procedurën penale.
“Në kuadër të këtij aksioni, Prokurori i Shtetit ka sekuestruar: dy (2) vetura në vlerë rreth 80.000 euro, një (1) orë dore të markës Rolex në vlerë afro 8000-10.000 euro, pesë (5) telefona celularë, si dhe dokumente të tjera të cilat do të shërbejnë si prova materiale në këtë procedurë penale”, thuhet më tej në njoftim.
Prokuroria ka bërë të ditur se brenda afatit ligjor do të parashtrojë kërkesë për caktimin e masave të sigurisë ndaj të ndaluarve.
