Ish-deputeti i PDK-së, Ferat Shala ka njoftuar se nuk do të jetë pjesë e listës së kandidatëve të këtij subjekti politik në zgjedhjet e ardhshme që do të mbahen më 7 qershor.
Pas katër mandateve si deputet në Kuvendin e Kosovës, Shala tha se vendimi është i parevokueshëm dhe është marrë pas reflektimit për nevojën e ndryshimeve brenda partisë.
Ai theksoi se ky vendim nuk nënkupton largim nga PDK-ja, por krijim hapësire për kuadro të reja politike.
“PDK-së i duhet frymëmarrje e re politike, gjithmonë duke e ruajtur trashëgiminë dhe frymën autentike politike”, ka shkruar Shala në Facebook.
Sipas tij, PDK-ja duhet të jetë më konkurruese dhe më përfaqësuese në skenën politike, ndërsa vendi ka nevojë për energji të reja, përgjegjësi dhe orientim drejt zhvillimit të qëndrueshëm ekonomik e politik.
Shala ka bërë të ditur se do të vazhdojë të jetë pjesë e strukturave të PDK-së, përkatësisht në Kryesi dhe Këshill Drejtues.
Ai falënderoi kolegët, bashkëluftëtarët, mbështetësit, votuesit e PDK-së dhe familjen për përkrahjen gjatë rrugëtimit të tij politik.
Zgjedhjet parlamentare të jashtëzakonshme do të mbahen më 7 qershor.
