Kryetari i Prishtinës, Përparim Rama, ka theksuar rëndësinë e bashkëpunimit politik dhe institucional për zhvillimin e kryeqytetit dhe mirëqenien e qytetarëve.
Ai ka deklaruar se qeverisja duhet të jetë në shërbim të qytetarëve, duke vënë në pah se politika nuk është qëllim në vetvete, por mjet për të arritur të mirën publike.
Sipas tij, Prishtina ndodhet në një moment të rëndësishëm zhvillimor, sidomos me projektet madhore që e presin, përfshirë përgatitjet për Lojërat Mesdhetare.
Rama ka bërë të ditur se është arritur një bashkëqeverisje në kryeqytet me disa subjekte politike, përfshirë Lidhjen Demokratike të Kosovës, Aleancën për Ardhmërinë e Kosovës, Nisma Socialdemokrate, Lidhja për Prishtinën dhe Partinë Demokratike të Kosovës, duke e cilësuar këtë si një qasje gjithëpërfshirëse dhe funksionale.
Ai ka shprehur gjithashtu mirënjohje për drejtorët e deritanishëm për kontributin e tyre, ndërsa u ka uruar suksese atyre të rinjve në detyrat e reja.
Rama ka ritheksuar mbështetjen e tij për LDK-në, duke nënvizuar nevojën për stabilitet institucional, bashkëpunim dhe vizion të përbashkët për të ardhmen e vendit./teve1.info/
