Gjykata Themelore në Gjakovë i ka caktuar masën e paraburgimit prej një muaji të pandehurit O. B., i cili dyshohet për veprën penale “tentim vrasje”, që dyshohet se ka ndodhur më 2 maj 2026.
Sipas kërkesës së Prokurorisë Themelore në Gjakovë, rasti ka ndodhur rreth orës 14:25, në terasën e një lokali në këtë qytet, pas një mosmarrëveshjeje të mëhershme mes të pandehurit dhe të dëmtuarit A. D.
Në njoftim thuhet se i dyshuari fillimisht e ka sulmuar fizikisht viktimën.
“Fillimisht i pandehuri O. B. e ka goditur me shqelm në gjoks të dëmtuarin, ndërsa më pas, pasi ai ka tentuar të largohet, ka nxjerrë një pistoletë dhe ka shtënë një herë në drejtim të tij”, thuhet në njoftim.
Sipas të njëjtit burim, i pandehuri më pas e ka goditur të dëmtuarin edhe me kokë, duke i shkaktuar lëndime trupore.
“I dëmtuari është dërguar për trajtim mjekësor, ndërsa i pandehuri është larguar nga vendi i ngjarjes. Policia ka arritur të sekuestrojë armën dhe një thikë”, thuhet më tej.
Pas mbajtjes së seancës dëgjimore, gjyqtari i procedurës paraprake, Driton Sadiku, ka vlerësuar se janë përmbushur kushtet ligjore për caktimin e paraburgimit.
Me vendimin e gjykatës, O. B. do të qëndrojë në paraburgim për një muaj, periudhë e cila llogaritet nga dita e arrestimit.
Palët kanë të drejtë ankese ndaj këtij vendimi në Gjykatën e Apelit të Kosovës.
