Ndonëse Qeveri në detyrë, stafi po i rritet.
Vetëm të premten, kryeministri në detyrë Albin Kurti emëroi tre zëvendësministra, në tri dikastere qeveritare.
E shtimi i stafit tash kur dihet edhe data e zgjedhjeve, s’shihet si nevojë institucionale por si sistemim i njerëzve partiak.
“Nuk është e nevojshme me bo emërime të reja të zv/ministrave për shkak se nuk kanë punë që munden me i kry, prandaj është absurde kur dihet data e zgjedhjeve tash në këtë kohë të emëroi zëvendësministra. Ka pasur kohë prej kur është themeluar qeveria dha tash kur qeveria është në detyrë, kjo është me e ble një individ që me i jep rrogë”, tha njohësi i politikës, Arton Demhasaj.
Kështu mendon edhe politologu Elbasan Osmani, që thotë se këto lëvizje, s’kanë të bëjnë me ushtrimin efektiv të detyrës.
“Janë vetëm për qëllime elektorale dhe nuk kanë të bëjnë asgjë me gatishmërinë e tij për të ushtruar ato funksione sepse në të kundërtën këta zv/ministra do të mund të emëroheshin edhe më herët, por kjo po bëhet vetëm për shkak të shpërndarjes së Kuvendit dhe shpalljes së zgjedhjeve”, thotë Osmani.
Andaj vlerësohet se Qeveria duhet të jetë e kujdesshme e mos t’i kalojë kompetencat e saj.
“Qeveria në detyrë është thjesht qeveri kujdestare që mos i me lënë procese në gjysmë por jo të fillojë procese të reja, të emërojë njerëz në pozita të caktuara apo me hap konkurse për pozita tepër të rëndësishme e aq më pak kur flasim për buxhetin e shtetit”, thotë Demhasaj.
Reagim për këtë pati edhe nga partitë deri tash opozitare.
Nënkryetarja e PDK-së, Vlora Çitaku tha se kjo nuk paraqet funksionim institucional, por një qasje abuzive që e trajton shtetin si pronë politike dhe cenon demokracinë.
Edhe Hykmete Bajrami e LDK-së, shkroi se këto emërime s’janë për punë, por vetëm sa për të marrë pagë nga buxheti i shtetit, pa bërë asgjë.
Të panevojshme në kohë zgjedhjesh, i cilësoi edhe kreu i AAK-së, Ramush Haradinaj.
Qeveria aktuale ka gjithsej 19 ministri, apo 4 më shumë se që i kishte në mandatin e kaluar.
