Kryetari i Partisë Demokratike të Kosovës, Bedri Hamza, ka uruar qytetarët me rastin e 1 Majit, Ditës Ndërkombëtare të Punëtorëve, duke theksuar sfidat me të cilat, sipas tij, përballen punëtorët në vend.
Hamza ka deklaruar se kjo ditë po shënohet në kushte të vështira ekonomike, të karakterizuara nga paga të ulëta dhe çmime të larta, ndërsa ka kritikuar qeverinë për mungesë të vëmendjes ndaj punëtorëve.
“Edhe këtë 1 Maj po e presim me shumë sfida: paga të ulëta, çmime të larta dhe një qeveri që e ka harruar punëtorin. Shumë prej jush punoni çdo ditë, por mezi ia dilni. Pa kushte të mira pune, pa siguri, pa mbështetje. Shumë familje në vendin tonë luftojnë çdo ditë për një jetë më të mirë. Ky është realiteti ynë, të cilin duhet ta ndryshojmë së bashku”, ka shkruar ai në Facebook.
Hamza ka bërë thirrje për më shumë angazhim institucional, në mënyrë që puna të respektohet, familjet të mbrohen dhe e ardhmja të jetë më e sigurt për të gjithë.
“Ky është realiteti ynë, të cilin duhet ta ndryshojmë së bashku. Duhet të angazhohemi më shumë që puna të respektohet, familjet të mbrohen dhe e ardhmja të jetë më e sigurt për të gjithë”, ka përfunduar Hamza./teve1.info/
