Komentet e fundit të kryeministrit polak, Donald Tusk, i cili paralajmëron se një sulm rus ndaj NATO-s mund të ndodhë “brenda muajsh, jo vitesh”, kanë tërhequr një reagim të matur nga udhëheqës të tjerë evropianë.
Presidenti i Finlandës, Alexander Stubb, në një konferencë për media minimizoi mundësinë e një përshkallëzimi të afërt, duke theksuar përgatitjen mbi alarmin:
“Ne punojmë në lloje të ndryshme skenarësh, por unë kthehem te qëndrimi i ftohtë, i qetë dhe i përmbajtur [mesazh]. Nuk shoh ndonjë nxitje që Rusia të testojë Nenin 5 të NATO-s.
Gjithmonë do të ketë teste hibride, nuk e mohoj këtë. Por nëse shikoni krahun lindor, duke filluar nga verilindja, Skandinavia verilindore, Norvegjia, Finlanda, shtetet baltike, Polonia, pastaj deri në Ukrainë, nuk mendoj se do të ketë një test”, tha ai, ka cituar Guardian.
Stubb shtoi se Shtetet e Bashkuara presin që Evropa të marrë më shumë përgjegjësi për mbrojtjen e saj, duke sugjeruar një zhvendosje në ndarjen e barrës nga “60-40 SHBA Evropë në ndoshta më afër 50-50”.
“Nuk e dimë se ku do të përfundojë. Por mendoj se është mirë që shumë vende të tjera evropiane tani po fillojnë të shpenzojnë shuma të mjaftueshme për mbrojtjen e tyre”, tha ai.
Ai gjithashtu nxiti përvetësimin e “mentalitetit finlandez: mos u shqetësoni shumë për atë që mund të ndodhë; përgatituni për më të keqen në mënyrë që ta shmangni atë”.
